政壇：司法廉記北上閱兵 貪曾隨團認真諷刺
「貪曾」前特首曾蔭權爵士喺一二年被揭連串「貪盡海陸空、歎盡省港澳」嘅貪腐醜聞，案件調查至今超過三年仍未有下文，刑事檢控專員楊家雄今年六月底曾指有信心於三個月內會就貪曾案作檢控決定。雖然貪曾「落鑊」在即，但佢仲有份參加明日喺北京舉行嘅抗日戰爭勝利七十周年閱兵儀式，最令人意外嘅係，貪曾夫婦、律政司司長袁國強、廉政專員白韞六同終審法院首席法官馬道立竟然係同團，認真諷刺！
「貪曾」曾蔭權夫婦（圖）將與白韞六、袁國強等執法及司法官員同團閱兵齊歡暢。（資料圖片）
貪曾呢個戴罪之身，竟然同調查佢嘅白韞六、可能下令告佢嘅袁國強、可能審同判佢嘅馬道立同團，認真前所未見。咁嘅安排，亦令外界有無限聯想，上京閱兵行程期間，貪曾同司法及執法等官員會否有直接或間接接觸呢？唔知到時會否有人避之則吉，費事同貪曾齊歡暢閱兵，以免日後落人口實，被質疑有角色衝突呢？
據報今次北上閱兵，厚顏赴京嘅貪曾將可以登上天安門城樓觀看。不過，貪曾咪以為可以洋洋得意，因為於天朗氣清、陽光普照嘅情況下，據聞唔准攜帶電風扇、雨傘等，有關方面會提供樽裝水同帽等，又講到明男士可以免打領呔，惟須穿着西裝外套，歎慣食慣嘅貪曾隨時大出洋相。
另一方面，代表團成員當日抵達停車場，要露天步行入場同離開，前後夾埋約兩小時，強烈建議大家穿着輕便舒適同方便行走嘅鞋，而且一早提供緊急電話畀成員以備不時之需。
