政壇：肥佬黎 陳日君疑外國勢力撐腰
本月底就係佔領行動一周年，執法部門最近疑加快步伐檢控涉及非法佔中嘅個案，但話雖如此，壹傳媒集團前主席黎智英（肥佬黎）向泛民主派人士及團體秘密捐款醜聞，至今仍無下文，有人質疑因捐款涉外國勢力，令廉政公署「唔敢告」；曾支持佔中並向警方自首嘅天主教香港教區前主教陳日君，日前更公開承認自己正「逍遙法外」，莫非有外國勢力撐腰，法律面前都變得唔係人人平等，甚至只蝦啲基層人士或「土包子」？
仍去美國遊湖歎世界
去年七月，一批密件揭發肥佬黎於二○一二年至一四年間，曾向泛民團體及人士秘密捐款逾四千萬元，廉署人員於同年八月曾突擊搜查肥佬黎位於何文田寓所近四小時。同年九月，肥佬黎一度到廉署受查，事隔一年案件似乎停滯不前，肥佬黎等人仍然未「落鑊」，較早一段時間仲可以離開香港去到美國紐約州的Saranac Lake歎世界，疑似「避風頭」之餘，亦令人感覺剃緊執法部門眼眉。
另一方面，陳日君曾因參與佔中，事後聯同佔中三子向警方自首，警方遲遲未有跟進行動，陳日君日前於網誌「反挑機」，主動提及有學生代表因衝擊公民廣場被檢控，相反自己至今仍未接受警方「預約拘捕」，甚至形容為「逍遙法外」，反問「在法律前不是人人平等的嗎」？呢番言論又係挑戰執法部門。
正如有政界中人指捐款醜聞證據確鑿有晒單據，外界已質疑肥佬黎與外國關係千絲萬縷，現在陳日君如此大言不慚，直認自己仍然「逍遙法外」，加上佔領行動被建制派中人質疑有外國勢力介入，有政界中人反問，莫非有外國勢力撐腰，法律面前都變得唔係人人平等，甚至係只蝦土包子？一句到尾，有關執法部門係時候雷厲風行，果斷執法，否則令外界質疑執法部門係咪怕咗外國勢力。
港大續有人「搞風搞雨」
另一方面，與肥佬黎、陳日君被指同屬「搞事四人幫」的另外兩名成員，即「民主阿婆」前政務司司長陳方安生及「李漢奸」民主黨創黨主席李柱銘亦有動作，二人尋日疑撐港大法律學院前院長陳文敏，竟然出席港大畢業生議會特別會議，睇怕港大都受寵若驚。民主阿婆同李漢奸親自介入港大副校長風波，背後嘅政治角力肯定再度升溫，睇怕港大一日對副校長任命未下定論，都會繼續有人「搞風搞雨」，永無寧日。
