城中鏡：田二少孫仔 夠膽騎鱷背
最近踏入六十五歲生日嘅新民黨立法會議員「田二少」田北辰，帶埋兩個滿一歲嘅外孫，首次一齊去澳洲慶祝生日。期間，估唔到佢孫仔人仔細細，仲咬住奶嘴，竟然夠膽坐喺鱷魚背，兩隻手仔郁吓郁吓幫佢抓背脊添，難怪田二少大讚孫仔夠膽識，「虎公無犬孫」咁話。
「小生」田北辰同兩個外孫首次一齊去澳洲旅行，仲係一齊過生日。
田北辰帶孫仔坐鱷魚背，認真夠膽識。
趁立法會放暑假，田二少最近同兩個外孫去澳洲探鱷魚同袋鼠，喺社交網站上載多張相片，佢話「逢五逢十」係大壽，連同兩個外孫壽星，首次一齊慶祝生日，因此要「搞搞新意思」，學埋公仔箱啱啱播完嘅節目，形容此行係「小生」同兩外孫去旅行，而相對同鱷魚零距離接觸，據田二少相片所見，佢同孫仔好似對住袋鼠，仲停留喺離遠望吓嘅安全距離。
