城中鏡：高官頂空氣
今屆無家者世界盃香港代表隊喺尋日舉行授旗禮，擔任主禮嘉賓嘅食物及衞生局局長高永文醫生同立法會議員「長毛」梁國雄，落場同一眾參賽者踢波。腳穿波砵、但同時着咗條長褲嘅高醫生，全程表現生硬，冇乜掂波。期間，有隊友喺禁區傳個高波畀佢頂頭槌射龍，點知佢就「搣屎」咗變頂空氣。好彩佢只係踢咗十幾分鐘，就出場走人，先至冇累到隊友輸波。
香港無家者世界盃代表隊昨舉行授旗禮。
高醫生着住條長褲落場踢波，表現生硬。
長毛犯規少咗，開頭表現生猛，唔似就嚟六十歲。
李宗德（右）同太太Josephine都熱愛睇波。
長毛生猛30分鐘
高醫生致詞時解釋，以前佢都有踢吓波，但依家老咗就少咗落場，上一對波砵已經係二十幾年前買落，結果舊年十月攞番出嚟比賽，踢兩下就「甩底」，要匆忙喺附近買過對新嘅。至於點解要着長褲踢波咁騎呢，佢話自己有對「香雞腳」，因此絕少着短褲示人。
至於出名茅波嘅長毛，今次落場犯規少咗，開頭表現亦相當生猛，完全唔似就嚟六十歲，但原來佢嘅活躍表現，只係維持到約三十分鐘，之後就要出場休息。高醫生同長毛先後被換走後，佢哋嗰隊由歷屆無家者世界盃代表隊組成嘅「曙光隊」，立即表現回勇，最終以二比一贏咗今年嘅代表隊。
另一主禮嘉賓和富社會企業會長Joseph李宗德尋日雖然冇落到場，但係就帶咗太太Josephine嚟捧場打氣。Josephine自言唔識踢波，但識睇波，得閒就會跟埋香港女子足球隊到外地作賽兼睇波。Joseph就話自己細個時都有踢開足球，但之後受過傷，就唔敢再踢，但仍無損佢對足球嘅熱愛。
