政壇：梁美芬遊完埠 補鑊講鉛水
鉛水風波愈演愈烈，未見平息，最新連學校都有中招個案，起初揭發啟晴邨食水含鉛超標嘅白鴿黨九龍西議員黃碧雲一直死咬議題不放，相反同屬九龍西、西九新動力嘅梁美芬，自從七月底同一批律師組成專家團，協助居民進行索償後，就好似無咗蹤影咁，全程只有社區主任跟進，直至最近外遊結束後，佢先至喺電台英文節目《給香港的信》補鑊。
梁美芬尋日喺電台節目，要求政府盡快解決鉛水問題。（資料圖片）
據梁美芬喺節目中嘅發言全文，佢提到要求政府盡快為受影響家庭提供驗水、驗血服務，搞清楚點解有事、解決方法及補償方案。
不過，補鑊講番鉛水風波係一回事，梁美芬日前出席活動時，無主動講起鉛水風波，仲係講緊早前十多日歐遊嘅經歷，包括佢哋一家四口喺瑞士參加整錶課程，足足整咗四個鐘等。話時話，梁美芬夠晒淡定，對於快將舉行嘅區選，佢嘅地區樁腳被窮追狂打，猶如熱窩上嘅螞蟻，認真相映成趣！
