最近環球股市大幅波動,唔少股民都損手爛腳,有苦自己知。財爺「鬍鬚曾」曾俊華尋日喺最新題為「再談風險」嘅網誌,無趁機安撫股民忐忑不安嘅情緒,相反就繼續「扮先知」,話自己喺早幾篇網誌講過,各界均預期美國加息周期將會喺今年內啟動,美元將繼續保持強勢,因而有機會令一啲經濟基調較為薄弱嘅亞洲國家同新興市場,出現資金外流、貨幣貶值,以至資產價格大幅調整,影響全球金融穩定。

料下半年經濟增長較慢

鬍鬚曾又列舉例子,引證佢嘅說法,話唔少新興市場已出現明顯資金流走,匯率同股市亦陸續出現大幅調整等,但問題亦隨之而來。到底係鬍鬚曾往績差勁,所以無人理佢嘅網誌預言,定係佢發出嘅預警唔到位,甚至係唔夠震撼呢?

其後,佢疑為一直被狠批為「守財奴」、財政預算案年年估錯數等解畫,佢喺網誌提及,要評估一個經濟體面對風險時嘅承受能力,最重要係視乎本身經濟基調,如果經常帳同財政同時出現赤字,通常係一個經濟體基本面出現結構性問題、內外失衡嘅先兆。

對於香港今年下半年,鬍鬚曾估計,無可避免會繼續受到眾多外圍不明朗因素影響,包括美國加息步伐未明、歐洲同日本經濟未見復甦,以及中國經濟下行壓力,加上需要面對金融市場波動、外貿疲弱同旅遊業放緩等多項挑戰,經濟增長速度可能會較上半年為慢。

但同一時間,佢認為大家毋須過分憂慮或悲觀,大讚本港經常帳同財政預算都有盈餘,經濟基調仍然保持良好,相信有足夠實力同經驗,應付可能出現嘅各種風浪,似乎想曲線為自己理財哲學嘅面上「貼金」,莫非鬍鬚曾唔記得預算案盈餘年年滿瀉,仍然被批小恩小惠派糖嘅場面?

第一手消息請下載on.cc東網iPhone/iPad/Android/Windows Phone Apps