政壇：「雙北」鬥撐電車 隔空舌戰

田少被嘲「偶爾紆尊降貴」

年底區議會選舉同明年立法會選舉在即，民生議題畀各大政黨政團炒熱在所難免，由七月初爆出嘅鉛水風波，半山四棵石牆樹被斬、星光大道優化爭議，以至支持同反對電車存廢等，一時之間成為好多人嘅關注焦點，其中撐保留電車嘅自拍照片，幾乎成為香港島四個區議會、各個選區疑似候選人嘅指定動作，甚至暗中已延伸並打開明年立法會港島區選舉嘅戰幔。

話說田少早前喺社交網站撐電車，寸爆話如果取消電車，不如順手拆埋政府總部同立法會，咁就無人會示威，不過寸得人多，終畀人寸番轉頭，吳秋北前日亦有上載坐電車嘅相片，起初講緊電車係港島嘅重要特徵，亦係港島人生活嘅重要部分，轉頭就開火，語帶雙關指出，「哪是貴公子偶爾紆尊降貴能體會、能理解、能保得住」，似乎把矛頭直指田少。

「雙北」吳秋北同田少突然就撐電車展開隔空舌戰，可能為明年立法會港島區地方直選鋪路。唔通係「前哨戰」？據知港島區明年很大機會由七席，減少一席至只有六席，僧多粥少嘅情況下，亦無礙各方搶位，其中富貴黨喺二○一二年港島區直選空手而回，有傳田北俊有意空降港島區參選收復失地，其原本新界東議席就讓予富貴黨主席、紡織及製衣界議員鍾國斌接棒。

工聯會方面，二○一二年破天荒於港島區首次取得議席突破，但面對港島區可能由「七變六」，包括吳秋北在內嘅工聯會中人都不敢怠慢，提早明示暗寸，仍對港島區議席志在必得。由此觀之，「雙北」嘅隔空交手，係開始而非結束，未來相信會好戲連場。