鉛水風波愈演愈烈，除了屋邨驗出鉛水超標外，多間中學和小學亦中招，不過教育局拒為全港學校驗水，只為約80間學校加裝濾水器，家長們擔心不已，於是向局長吳得掂問話。

家　長：有中小學中招，點解你仲唔大規模驗水？

吳得掂：要優先處理公屋食水含鉛問題，學生又唔係長時間喺學校逗留，唔使咁擔心嘅！

家　長：鉛水飲少少都唔好啦！

吳得掂：叫學生帶水返學咪得囉。

家　長：帶得幾多水呀？

吳得掂：會裝濾水器o架嘛，最多咪飲汽水，唔好飲水。

家　長：飲汽水唔健康，你咪亂咁噏啦！

吳得掂：咁你想囝囝囡囡發展遲緩吖，定係變肥仔先？

家　長：我想打到你變肥仔呀！

第一手消息請下載on.cc東網iPhone/iPad/Android/Windows Phone Apps