政壇：潮州家己冷 為「大男人」平反
坊間一向有潮州男人係大男人嘅傳統睇法，認為潮州女人就冇地位、冇聲出。日前，多個潮州男人參加同一活動，包括潮屬社團總會（總會）會董陳光明（Johnny）、觀塘區議會主席陳振彬（Bunny）都話潮州大男人之說係誤解，一於為「家己冷」平反。
陳光明（左）及劉文文不約而同自爆媽媽係屋企話事人。
Johnny以自己屋企為例話，其實只係佢媽媽喺外面畀足面爸爸，一返到屋企，無論家事或財政，都係由媽媽作主。Bunny都大讚娶到潮州女仔好幸福，仲自爆佢媽媽好注重潮州文化，喺屋企只講潮州話，所以佢都識講潮州話，雖然潮州人講嘢大聲啲，但好重孝義，以長輩為先，做人有規矩。
總會常務會董劉文文就話，佢爸爸絕對講唔上係大男人，屋企所有安排都係由媽媽決定，爸爸好少理。佢盛讚媽媽最叻之處係識得喺外面為爸爸留情面，所以潮州女人真係幾抵得諗。
