自由黨榮譽主席田北俊（田少）之前喺社交網站以豬頭相諷刺政改表決當日離場甩轆、無投票嘅建制派議員，被網民評佢「連太平洋都可以抽乾」，自此田少就開始抽水成癮，無論關唔關自己事，都勢必好似塘邊鶴咁「搭兩句嘴」抽水。好似之前諷刺現屆政府係熱廚房，無人肯做、港男用四十萬元包直升機同買鑽戒求婚、取消中環一段電車路建議，以至最近港大校委會及任命副校長風波，田少都發文抽水抽一餐。
不過，田少大學時期喺美國讀書，照道理應該同港大校委會件事「大纜都扯唔埋」，但佢前日竟然喺電台節目上又抽水，話自己認識嘅唔少港大校委會成員都被游說，仲話中環、西環都出埋手，游說校委會成員以「等埋首席副校長」任命為理由，拖延任命副校長一職。對於被指干預學術自由，政府尋日都忍唔住發表聲明，批評田少有關指控毫無事實根據，仲話對田少嘅言論深表遺憾，今次田少真係抽水抽着火水喇。
第一手消息請下載on.cc東網
