立法會前議員黃成智早前被民主黨（白鴿黨）踢出黨，與白鴿黨貌合神離嘅前立法局議員狄志遠（Dick）立即撐老友，尋日阿Dick出席電台節目，直言新舊黨員立場及思路不一致，對於乳鴿批評黨高層密會港澳辦副主任馮巍是「先斬後奏」，佢擔心或有新階段嘅黨內鬥爭，佢打定主意喺適當時候退黨，今次真係懶理佢四分五裂。
擬與溫和新組織結盟
阿Dick話，白鴿黨自政改方案一役以來，路線愈行愈激，排斥及邊緣化黨內的溫和人士，對比起一○年時透過談判達成共識，現時該黨徘徊在激進與溫和之間，先係造成內傷嘅主因。問到今次與京官見面，會否影響即將來臨嘅區議會選情，他指「破冰」溝通係好事，並反問走激進路線嘅白鴿黨係咪會得到真正嘅支持呢？加上激進嘅泛民主派政黨有很多，選民為何一定要揀白鴿黨呢？
談到黨內矛盾，阿Dick話早年該黨為了做好傳承工作，特意安排咗十幾個新人「升呢」做中委，並放手給他們處理黨務。不過，後來先發現原來新舊黨員之間嘅立場、思路並不一致，後生嘅乳鴿仲愈來愈激，阿Dick話，佢會用君子分手嘅方式，喺適當時間會再交代退黨一事，但佢強調，只是不滿現時白鴿黨用排斥及打壓嘅方式對待持有不同意見嘅黨員。至於新籌組嘅政黨「新思維」，日後會同其他走溫和路線的新組織保持緊密溝通，例如與「民主思路」等組織聯成一線，組成強大第三路線，有人就提議佢哋結盟後，改名為「民主新思維」，阿Dick聽落都覺得不錯。
第一手消息請下載on.cc東網
