新民黨主席兼立法會議員葉劉淑儀大年初二喺沙田車公廟被麒麟撞飛，當時堪輿學家麥玲玲已預言她會「全年黑過鬼」，結果今年真係特別多是非，好似黑氣纏身咁。最近佢個黨又爆一單新嘢，搞到得罪地方鄉紳，沙田鄉事委員會主席莫錦貴更去信葉太及沙田民政事務專員，要求嚴正處理今次事件，呢件事最後梗係要葉劉出面，有話佢會道歉擺平喎。

話說公民力量兼新民黨沙田區議員黃宇翰上周喺電台節目中「講錯嘢」，令一眾鄉紳大為震怒，當時黃宇翰提及寮屋僭建及利用寮屋種票，呢個指控有幾多證據冇人知，但鄉紳就大怒，莫錦貴事後隨即向葉太發信，內容直斥黃宇翰「污衊和抹黑村代表、鄉事組織包庇寮屋僭建、利用寮屋進行選民種票」，批評其言論不負責任。

莫喺信中強調，要登記成為村代表選舉嘅選民，必須三年內都在該村居住，並以此為主要地址，「花三年的時間，而且是利用寮屋住址『種票』，豈不是很白癡？」莫錦貴續指，黃宇翰連村代表選舉及區議會選舉嘅選民資格都搞不清楚，令人大跌眼鏡，更會令人誤以為新民黨決意與鄉事派駁火。莫仲話，葉太要規管黨員言論，以免再發生傷害彼此感情嘅事。

傳葉劉擬回信道歉

據悉，有指葉太會透過回信就此事道歉，但佢正外遊仍未返港，而莫錦貴亦稱未收到有關回信。我哋多次致電黃宇翰，但始終未能聯絡上。另外，莫錦貴喺信末邀請葉太出席十一月沙田鄉事委員會舉辦嘅太平清醮，並擔任主禮嘉賓，未知佢會否應邀出席，唔知咁樣可唔可以化解被麒麟撞飛嘅黑氣呢？

第一手消息請下載on.cc東網iPhone/iPad/Android/Windows Phone Apps