城中鏡：籌款「博」到盡
慈善機構籌款固然要搵大「水喉」，但都咪睇小街坊積少成多嘅力量。博愛醫院早前舉行「博愛月全港慈善籌款」開幕禮，一眾博愛董事局成員及名人齊集，為長達七個月、於全港十八區舉行嘅年度大型籌款活動助陣。身兼博愛月籌委會主席嘅博愛副主席李柏成當日啱啱由加拿大返港，佢話預咗未來有排忙，見佢成晚積極拉攏有潛力嘅團體齊齊度橋籌款，為籌款真係少啲心機都唔得。
李柏成（中）擔旗籌款，曾耀祥（左）及陳偉倫齊打氣。
郭振華（右）同譚姜美珠（中）及丈夫譚立仁係相識多年老友。
經常周圍飛嘅彭少衍及太太關麗雯出席支持博愛籌款活動。
將赴日本安老院取經
博愛主席譚姜美珠、副主席彭少衍及簡陳擷霞等人都有到場。簡太話，十一月中旬佢哋將到日本東京考察安老院舍設施及服務，希望為博愛興建中嘅全亞洲最大安老院取經。博愛安老服務委員會主席陳偉倫就話，日本人口老化問題早過香港出現，相信當地高質素嘅安老服務值得借鏡。
博愛永遠顧問曾耀祥都有到場，佢講起人民幣貶值就拍晒手掌，事關過去十年人仔狂升令好多廠商捱唔住。佢原本亦打算搬廠，仲考慮過搬到斯里蘭卡，咁啱人民幣突然貶值，令佢鬆一口氣，暫時唔使搬廠住。彭少衍亦係人仔貶值受惠者，仲話長遠來睇，本港消費品可望有減價空間。
早前天津發生危險品倉庫爆炸，同場嘅香港工業總會副主席郭振華（Jimmy）都好唔得閒，佢話內地逢親發生事故，全國各地就會排查同類型工廠，所以佢都要忙於為位於惠州及龍崗嘅化工廠做「體檢」。所以話，喺內地投資設廠，人哋出事咪話唔關自己事。
