政壇：搞搞政：新東補選打頭炮 侯志強誓要威威
立法會新東議席補選明年初上演，鄉事派與建制派矛盾一觸即發，過去一直幫其他建制黨派「抬轎」助選嘅鄉議局，換屆後雄心壯志，想派人出戰新東補選打響頭炮，近日有傳被西環勸退。被鄉事派推舉補選嘅上水鄉事委員會主席侯志強就話，鄉議局曾經當面批評西環「大細超」，有心打壓鄉事派，佢仲表明考慮退出自由黨參選，近日佢同鄉紳合購新馬「新界威威」，若堅持出選成事，會成為鄉事派反擊打壓嘅頭炮。
侯志強話西環勸退鄉議局勿出戰補選嘅傳聞有八成內容準確，佢大爆當日鄉議局都有出聲，狠批西環「大細超」，唔准鄉議局派人參選，改繼續支持其他建制黨派參選人。
區選後將退黨
侯話，自己都係愛國愛港人士，「劏個心出嚟都係紅色」，而鄉事派就好似沉睡百幾年的獅子，「是時候要甦醒，否則就冇用嘞！」佢又透露，對於補選一直都密鑼緊鼓，積極做好準備，又打個比喻：「今時今日唔係水到渠成，係要做好預備先，成班兄弟掘靚條渠預備好，有水嚟先接到，最終係咪出選都會交畀鄉議局決定。」
侯志強所屬自由黨，曾表明不會派人參加新界東補選，侯如出選亦唔符合黨嘅立場喎。佢會唔會「光榮引退」，侯志強就明言，自己都係時候「告老還鄉」，預計會在區議會選舉後，即年底至明年初就會考慮退黨，稍後會向自由黨表明退黨意願。佢計劃退黨的時間，正正就是新界東補選的時候，看來佢已下定決心披甲上陣。
