自從般含道四棵榕樹被斬後，各界都關注樹木發展及環保議題，咁啱環保生態協會尋日搞咗個微電影首映會，微電影叫「咖啡渣之戀」，係講一對男女因為透過利用咖啡渣廢物利用而產生感情。主辦機構請咗民協立法會議員馮檢基（阿基）做主禮嘉賓。被問到點睇民主黨獲邀與港澳辦副主任馮巍見面一事，而民協又無獲邀，阿基似乎毫不在乎，話無乜所謂喎，民主黨還民主黨，民協還民協。

民協無獲邀見港澳辦副主任馮巍，馮檢基話無所謂。

再問阿基有冇獲邀請，佢就話冇，仲話唔會主動約見。回帶返到二○一○年嘅時候，民主黨同民協都有份被邀進入中聯辦就政改談判，但好多人都就唔記得民協有份見面；而今年五月阿基都有份獲邀去深圳同中央官員見面。不過，今次中聯辦只係搵咗民主黨而冇搵民協，阿基表面上就好似唔在乎咁，但實際唔知會否覺得不是味兒呢？

第一手消息請下載on.cc東網iPhone/iPad/Android/Windows Phone Apps