政壇：陳克勤網上爆粗 鬧狗殺手
區議會選舉臨近，明年又到立法會選舉，不少政黨為了爭取選票都可以去得好盡，就連民建聯立法會議員陳克勤都公然喺網上「爆粗」！
陳克勤喺社交網站留言，仲爆粗鬧虐狗者變態。（互聯網圖片）
話說克勤尋日凌晨喺社交網站上載一篇報道，內容涉及元朗有狗隻疑被虐殺，或者係件事太殘忍，一向關注動物權益嘅克勤顯得好上心，喺網上留言鬧爆狗殺手「真係好Ｘ街，你夜晚睏（瞓）得着咩？你有報應的！」睇嚟佢真係大動肝火，仲表明會要求「一哥」警務處處長處理案件。
問到克勤做乜咁激動，佢話，覺得虐殺狗隻「實在太過分」，所以先至留言「爆粗」，佢解釋自己平時「冇乜火」，只係覺得今次好離譜同變態，佢仲聲言有關留言係合適嘅。
