政壇：乳鴿「搣柴」玩跳巢
各方強攻年底區議會選舉，民主黨（白鴿黨）預計派出近百人參選區議會，不過，該黨中委會日前就否決咗沙田區議員麥潤培以白鴿黨名義出戰區選，按照黨規，麥潤培可以提出上訴，但預料推翻嘅機會唔大。近日，麥所在嘅選區已見異動，佢不但未撤宣傳橫額，反以非政黨嘅組織繼續宣傳，似乎有意跳巢另闢新天地咁，估唔到區選惡戰未到，白鴿黨已面臨又一次分裂！
麥潤培被指得罪人多
白鴿黨新界東支部早前爆出派系鬥爭，麥潤培被指得罪人多，遭黨內前綫派系封殺。中委會前日決定唔畀麥潤培以該黨名義出戰區選，按該黨黨規，除非上訴，即以會員大會投票嘅結果推翻中委會決定，否則只能退黨另謀出路。
麥潤培接受查詢時表示，未知會否參選，與支持者討論後會與白鴿黨溝通，希望解決問題，他對以白鴿黨名義出選有信心，暫不考慮以其他名義參選。不過，我哋發現麥潤培在所屬馬鞍山利安邨選區懸掛的宣傳橫額已經自動「搣柴」，白鴿黨黨徽不再出現在橫額上，反而換上佢自行成立的青少年團體「青靜動力」的標誌。咁樣將黨名「搣柴」，係咪下一步輪到跳巢呢？
除咗麥潤培外，仲有該黨社區主任決定喺區選前搣走白鴿黨招牌，改以個人名義參選。上屆選舉代表白鴿黨出選大埔富亨選區嘅任萬全，當年僅以五十四票輸畀民建聯王秋北，唔少黨友都睇好佢有望挑戰成功。不過，任萬全就話覺得白鴿黨理念同自己愈走愈遠，唔肯年輕化，政治立場又唔硬，寧願退黨用獨立人士身份參選，用個人政績爭取議席。
白鴿黨今年只派九十四人參選，比之前相對較少，都睇到該黨新人不足，如果因為派系鬥爭同黨務問題再令新人退黨，只會令該黨支持者不斷流失。
