城中鏡：劉仲恒「繩」就病童夢想

候任港鐵董事會主席馬時亨嘅女婿Kevin劉仲恒係慈善組織願望成真基金主席，最近佢接咗件好有挑戰性嘅任務，就係要短時間之內編織四百條手繩以作籌款之用。但係點樣動員義工幫手織手繩又真係煞費思量，幸好Kevin人面廣，得到中電企業發展總裁Quince莊偉茵拔刀相助，得以順利完成使命。

劉仲恒（左）同莊偉茵（右）一齊完成病童Pansy（中）嘅織手繩心願。

話說Kevin早前接觸到一位患癌症病童Pansy，雖然Pansy身臥病榻，但佢明白到世上有為數不少嘅小朋友，同樣受到病魔嘅折磨，亦唔似佢享受到香港高水準嘅醫療服務，所以希望編織手繩義賣籌款，協助內地嘅危疾病童。Kevin覺得Pansy年紀小小就懂得推己及人，於是就一口答應實現對方嘅心願。

Quince知悉Kevin急需義工，即動員中電義工隊及其家屬總共過百人，早前一齊喺Pansy帶領下，用咗半日時間完成目標。