城中鏡：羅傑斯揀股情有獨「中」
呢兩個月人人見到A股都O晒嘴，商品大王羅傑斯一於冇有怕，話自己上個月先又入咗批A股，雖則帳面計暫時損手，但佢講明唔打算斬纜，仲話會將手上嘅股票傳畀阿女。算唔算係買A股畀阿女做「嫁妝」呢？
羅傑斯同兩個寶貝女兩年前開心快拍。（資料圖片）
洋人唔興「嫁妝」？羅傑斯分分鐘「中國」過你，佢出晒名係中國通。佢呢兩日喺南京一個經濟論壇就話，佢已逐步撤離美國股市，事關升咗五年已經太多，佢亦撤出埋日本市場，佢最睇好中國市。佢仲認為十九世紀係英國嘅，二十世紀係美國嘅，而二十一世紀就係中國嘅。
羅傑斯出名係「愛女號」，佢為咗兩個寶貝女Happy同Bee學中文，早年全家由紐約搬去新加坡，又出埋《羅傑斯給寶貝女兒的12封信》，將其一生投資閱歷傳授畀兩個囡囡。
佢甚至講過想有個中國女婿，仲好似聽過話佢想寶貝女二十八歲後先結婚。咦，大女Happy家陣先十二歲，批A股若然係「嫁妝」，咪可以揸多十六年？睇咁長線？
