城中鏡：議員搶孤
香港潮屬社團總會趁尋日盂蘭節，首次喺香港舉辦「搶孤」比賽，即係參賽者要企喺台上掟迷你米袋，對手就要用大型竹簍搶接，地點就揀咗觀塘康寧道遊樂場。幾位立法會議員同潮屬社團總會成員都有落場參加「冠軍邀請賽」，同「搶孤」冠軍隊鬥過。睇一班議員個個出盡力搶米袋，莫非想同餓鬼爭食？
何俊賢（左起）、陳克勤、鍾樹根、姚思榮賽前影相係威係勢。
陳克勤玩得好投入，面容扭曲。
漁農界「高佬賢」何俊賢、陳克勤、旅遊界姚思榮都話要抱住必贏嘅決心，但鍾樹根就話志在參與，唔通建制派內有分歧？「志在參與」嘅樹根仲着住恤衫、西褲同皮鞋，後尾話驚「爆胎」，做吓後備就算。加上蔣麗芸去咗深圳，趕唔切返港，議員隊未出戰就差啲「甩轆」唔夠人，搞到要向對手潮屬社團總會，借咗會董馬軼超臨時加入「幫拖」。
比賽開始嗰陣，高佬賢首輪企喺較後嘅位置，結果淨係搶到六個米袋，吸取經驗後，佢次輪就衝到最前，勁搶十三個米袋，但係期間都唔小心跌咗啲出嚟。克勤仔亦非常投入，同隊友、對手偶有碰撞。而姚思榮就一直守住外圍位置，接旁邊嗰啲米袋，所以收穫好少，兩輪加埋只接得兩個米袋。
輸畀冠軍成條街
最終冠軍隊再下一城，兩隊「業餘」嘅議員隊同潮屬社團總會隊分別得第二及第三名，輸咗超過二十分。未知明年如果再有相同賽事，佢哋會唔會練多啲先參加呢？
其實盂蘭節搶米袋，會唔會變成同餓鬼爭食，唔太吉利呢？盂蘭文化節競賽總統籌胡炎松話，呢啲講法會誤解，因搶孤嘅祭品，已經由孤魂野鬼吸食靈氣先畀人食，唔會唔吉利喎。
