政壇：搞搞政：縱容衝擊港大 教協燒埋自己

香港研究協會喺八月十七至二十一日期間，訪問咗一千零八十八名市民，了解佢哋對立法會內十五個政團嘅支持度，以及就佢哋嘅表現進行評分。結果顯示，排名第三嘅富貴黨跌幅最勁，比上次跌咗零點一九分；其次就係排名第六嘅街工，跌咗零點一七分；至於排名第一嘅教協，就下跌咗零點一六分，相信係同教協副會長兼立法會教育界議員葉建源被指煽動學生衝擊港大校委會有關。

其實之前已有唔少人質疑，身為港大校友嘅葉建源涉嫌縱容衝擊校委會嘅學生，有團體仲發起請願以示不滿。但葉建源並無因外界嘅不滿聲音而變得低調，尋日接受電台訪問時更話擔心政府已全面控制校委會，透過委任校外人士為委員干預副校長嘅任命，又批評有關做法違反院校自主同學術自由。

教育局隨即反駁葉建源嘅指控全無事實根據，現時港大校委會內共有二十四個席位，其中只有主席同六名委員由特首作為校監委任，其餘由校委會、校董會、教員、職員、學生同研究生委任或互選產生，而本任校監只係委任咗新校務委員。

無論從校委會成員比例或本屆校監任命人數，話「政府已全面控制校委會」係無事實根據。其實再咁搞落去，教協形象同評分繼續插水就事小，連累港大聲譽嚴重受損先至事大。