呢幾日環球股市相當波動,港股一度急瀉,令一向叫價「硬淨」嘅樓市,都有業主信心動搖而減價求售。國際專業保險諮詢協會會長羅少雄同博愛醫院總理李豐年都認為,儘管金融市場近來風高浪急,但礙於香港地少人多,居住需求甚殷,唔擔心樓市大跌。

羅少雄(右)同李豐年都無懼股市拖冧樓市。

羅少雄話香港「磚頭」一向都有價值,因為幾百萬人喺一塊彈丸之地生活,論供求關係已經注定樓價好難下調。加上政府嘅財政收入,又好依賴土地拍賣或樓宇交易嘅印花稅收,所以政府係唔願意見到樓價大跌。對於近日有屋苑錄得成交價大插水,佢估計係賣方等錢使,而呢種大幅折讓嘅情況可能只屬曇花一現。至於樓市以外嘅投資,佢話要穩陣,股票就梗係買藍籌喇!

李豐年就話由於睇唔通股市為何大升,於是由四月份開始「持盈保泰」止賺,以致今次大冧市中無甚損失。佢都認同羅少雄所講,「磚頭」始終有價。尤其係位處市區嘅物業,既四通八達又有發展潛力,論抗跌力亦都較强。

第一手消息請下載on.cc東網iPhone/iPad/Android/Windows Phone Apps