政壇：張華峰寸證監唔肯求變
的士鬥Uber近期係城中熱話，一下子網上都畀「創新」、「與時並進」乜乜乜洗版。立法會金融服務界議員「肥老闆」張華峰亦有感而發，話最近一班金融界人士向佢反映，話證監會現時仍硬性規定證券行收到客戶電話落盤指示後，要講電話同客人覆盤兼要電話錄音，呢個做法實在非常Out。
張華峰話市場近年發展迅速，啲客已經好少利用電話做落盤買賣。（資料圖片）
肥老闆話市場近十年八年發展迅速，啲客已經好少利用電話做落盤買賣，多數係用WhatsApp或者微信同經紀聯絡，反問點解業界依家仍然唔可以用WhatsApp去覆盤，而一定要用電話回覆呢？佢炮轟政府同監管機構若故步自封、唔肯求變，只會阻礙市場向前發展。記者仲聽聞，班金融界人士正醞釀同證監會講數，建議放寬畀用WhatsApp等去覆盤。
證券及期貨專業總會永遠名譽會長王國安話依家銀行都用短訊覆盤啦，點解經紀要用電話同客人覆盤，係咪大細超？短訊同WhatsApp或者微信又有乜分別？就算電話有錄音都可以搵人假扮啫，如果要百分百肯定客人身份，證監會不如規定要用指紋或者驗DNA。明寸證監會！
王國安話明白證監會要保存交易指示記錄，一旦出咗事，可以追查到，所以佢哋就建議保留WhatsApp或者微信覆盤嘅內容以作記錄。
經紀咁睇，咁證監會呢？有市場人士問過證監會可唔可以用WhatsApp接盤，因為WhatsApp都係嚟自個客嘅電話啫！但證監會就話唔多安全，話好易畀人Hack（黑客入侵），有唔少漏洞咁話喎。
