政壇：肥根無懼划艇仔挑機
臨近區議會選舉，各政黨都磨拳擦掌，積極備戰，其中新民主同盟就計劃派出中大社工碩士周炫瑋挑戰已經連任多屆嘅大埔區議員「肥根」黃容根。不過，肥根身為立法會漁農界前議員，而且喺地區扎根多年，正所謂「猛虎不及地頭蟲」，要打敗佢並唔容易。對於被後生仔「挑機」，肥根腦轉數奇高，寸爆對方對該區一無所知，基本資料都未搞清楚。
設計圖片
今次越級挑戰嘅周炫瑋，讀大學時係划艇隊隊員，佢話如果同肥根鬥划艇未必會輸，仲希望憑着自己嘅划艇底子，可以同街坊多一啲話題。落區工作一年，佢指以前做運動員嘅刻苦訓練，對佢喺地區服務有好大幫助，事關以前划艇日日早起訓練，令佢依家每朝擺街站都唔覺辛苦。
如果真係成功當選，周炫瑋稱會第一時間邀請新同盟其他區議員成立一隊龍舟隊，目標係爭取來年嘅龍舟競渡比賽出線！區內人士分析，肥根年事已高，一直都想退休，所以落區時間都相應減少，話唔定背水一戰嘅周炫瑋，有機會靠划艇如魚得水。
「街坊唔叫唔會走」
對於有後生仔挑戰，肥根就氣定神閒話：「周先生係唔係搞錯咗呀？我嗰區得好少水上人喎，要打入水上人社區應該打隔籬區就真！呢度有乜都唔知，即係對地區唔認識啦！」講到自己有乜嘢優勝之處，肥根話自己擔任二十幾年區議員，街坊有眼見，「我唔會車大炮、講大話，只會做實務！街坊叫我唔好走，我就唔會走！」言談間完全感受到肥根充滿戰意同信心喎。艇仔遇着大白鯊，最終結果會係划得快上岸抑或被大白鯊吞噬？
