政壇：洋參大王 踩過界搞美容
恒發洋參搞埋美容！尋日恒發洋參中期業績發布會，公司將推出美容產品，呢啲日子，要講梗係講護膚。佢哋主席「洋參大王」楊永仁年近五十，但睇嚟唔多似，楊主席話自己冇乜點搽嘢，依家都考慮開始用喇！
楊永仁（中）話要考慮吓用護膚品喎。
咁當然，又唔會只講護膚啦。近排本港零售市道差，舖租跌，會唔會趁勢開多幾間舖？楊主席話唔啦，佢嫌香港舖租始終太貴，佢哋公司唔需要靠太多實體店做招徠提升生意額，做VIP熟客生意根本唔使靠實體店，佢仲話要「用好少嘅錢，去做好大嘅生意」。既然係咁，公司嚟緊啲美容產品，佢自己會唔會做代言人，慳番代言費？楊主席話No喎，因為「品牌行先」，兼唔想上電視咁話。
其實，佢哋嘅美容產品已經有代言人，就係沈大師，包裝會有沈大師個「嘜頭」添！定啲嚟，唔係股評嗰位沈大師，係藝人沈卓盈。
