政壇：惡搞橫額 勁玩發叔工聯會
立法會喺六一八表決政改方案時，建制派因「等埋發叔」甩轆收場。之後工聯會一款以陳婉嫻、黃國健等議員名義出街、喺全港懸掛一幅橫額「後政改」橫額，大字標題「認清普選殺手」，副題係「廿八票否決普選，泛民歷史罪責冇得走」，同時附上一個持槍嘅黑影人像，中間有放大鏡照出是「泛民」兩個字，旨在批評泛民係令香港失去普選嘅殺手。
原本呢款橫額嘅訊息清楚易明，絕對係選舉前聲討泛民、提醒選民票債票償嘅強而有力攻勢之一，之不過政改「甩轆」事件發生後，據聞部分建制派即時收韁，避免用普選殺手、票債票償等口號，費事畀機會泛民借題發揮揶揄「甩轆」一事。
但要發生嘅始終都無可避免。近日網上流傳一張懸掛喺街上、有工聯會標誌嘅改圖橫額，大字標題同樣有「認清普選殺手」，最吸睛嘅副題被改為「投票拉隊走，發叔歷史罪責冇得走」，而原本黑影人像亦變成劉皇發嘅肖像，放大鏡照出亦是「發叔」兩個字，如果唔細心睇，真係會以為工聯會向發叔開火，狠批對方先係普選殺手。
黃國健接受查詢時火氣十足，批評惡搞橫額「無聊、低莊」，透露曾有其他議員問及惡搞橫額係咪工聯會所為，佢表明佢哋唔會咁做，如果發叔一方問到就會作出解釋。佢其後進一步話，如搵到該惡搞橫額確實位置會報警處理喎。
