政壇：搞搞政：黑英呻空氣差禍害長者
香港嘅空氣質素好差，仲記得早前天文台前台長「黑英」林超英喺網誌狂呻，喺今個月八號本港錄得開埠以來最高溫嗰日，佢去咗佐敦、油麻地一趟，結果街邊廢氣令佢每吸一下就咳一下，點知件事原來仲有下文。
黑英前日繼續喺網誌發牢騷，話前日嘅日間陽光暴曬，光化學作用將空氣中嘅臭氧水平推高，大概係嗰日影響健康嘅主要空氣污染因素，喺街上行嘅時候，喉嚨好唔舒服，空氣再一次唔能夠呼吸，就似本月八號嗰日咁。
跟住佢話見嗰日空氣咁差，於是打電話畀阿媽提佢唔好出街。可惜呢個電話打得太遲，黑英阿媽當日已去咗晨運，空氣差刺激其呼吸道舊患，搞到連續咳咗幾日，而且痰中帶血絲，後來甚至咳血失控而需要住院，至今仍未出院。
黑英話真實嘅案例證明空氣污染唔只係概念上嘅「健康風險」，而係確實危害健康，長者同長期病患者尤其受到衝擊。為咗長者同弱勢群體嘅健康，佢認為香港同整個華南區域必須大力合作，由源頭開始減少空氣污染，至於香港境內嘅個別重災區，例如東涌、中西區，更要想方法減少污染物如二氧化氮嘅排放，而呢方面就牽涉到第三條跑道嘅興廢同市區汽流量控制等城市建設嘅根本性問題嘞！
