政壇：白鴿與「傘兵」 8選區互咬
臨近區議會換屆選舉，唔少佔領行動後嘅「傘兵」都話要落區參選，傳統泛民大黨白鴿黨就同呢班傘兵撞到應一應，依家至少有八區有撞區情況發生，睇嚟雙方都好難有共識，互鬥在所難免。
白鴿黨尋日舉行傳媒茶敍，講嚟緊區議會選舉部署。副主席尹兆堅話泛民已協調約二百人出選，但有十四個區同傘兵撞區，當中白鴿黨就佔咗八個，三個係同北區動源撞，兩個同青年新政撞，仲有部分係東九龍社區關注組、我們是未來等撞。其他黨派如公文袋、工黨同社民連都有六個區同傘兵撞。
出選人數大跌29%
青年新政早前話，希望透過初選決定邊個出選。尹兆堅就擺明反對，仲細數初選三大漏洞，首先係可能得百幾人投票，回應率唔高；第二係或有建制派動員左右結果；最後就係選舉經費花咗一大半喺初選，真正選舉就少咗資源。尹批評話：「民主派出選受制於建制派，（傘兵）點解咁冇政治智慧？」又諷刺對方「毋須隔空筆友式出聲明……口水戰對大家唔好」，仲話有心協調就要快啲，最遲要十月二日區議會選舉提名前解決喎。
照咁講，佢哋會唔會覺得傘兵係「鬼」呢？白鴿黨副主席羅健熙扮客氣，話唔會咁樣形容對方，不過有少少政治邏輯嘅人，都知多過一個泛民出選，結果必然不利。尹兆堅就講到好白，話咁發展落去，對方「無形中會變成建制B隊」。
講番選戰，白鴿黨今年會派九十四人出選，比今屆大跌兩成九，當中最年輕係打算出選西貢富君選區、二十一歲嘅陳展浚。羅健熙聲稱係要行「精兵制」，目標係保有現有議席四十四席，增減最多一至兩成，即係最差有機會跌至三十五席。條數咁計，唔知係咪為咗力保兩個超級區議會提名資格呢？
