城中鏡：陳瑞麟愛影幕後花絮夠真實
蜚聲國際珠寶始創人兼創意總監Dennis陳瑞麟熱衷於攝影，由最喜歡影人像到近年最愛影幕後花絮，覺得幕後花絮係真實嘅故事，當中最難忘嘅係同Maggie張曼玉合作，連續二十七小時嘅拍攝，將佢最罕見嘅一面展現於人前。
由最喜歡影人像到近年最愛影幕後花絮，陳瑞麟覺得幕後花絮係真實嘅故事。
陳瑞麟話張曼玉（右）親自幫模特兒化妝、整頭，唔係咁多人見過。
熱愛中國文化嘅Dennis透露着旗袍嘅女人係最靚嘅，所以好喜歡影以旗袍為主題嘅相，但近十年佢將鏡頭移師到幕後，焦點唔喺主角身上，而係影幕後花絮，佢話：「我嘅品牌成立咗十年，拍過無數嘅廣告，搵咗好多大師級如夏永康、陳漫影廣告相，而佢哋影時我都機不離身，我不停影behind the scene，因為覺得拍攝團隊背後係點冇人知，我好想同人分享呢種氣氛，啲人睇到可感受到背後嘅真實生活。」
Dennis品牌設計嘅葫蘆首飾，當年因為Maggie獲得康城影后時戴着，因而聲名大噪，而佢同Maggie更結下不了緣，Maggie不單為佢嘅品牌拍廣告相，仲參與埋做廣告創作總監。Dennis話：「我好記得有輯相由Maggie擔任廣告創作總監，佢做嘢真係好認真，當日我哋連續拍咗二十七小時，大家都冇瞓過，佢仲要親自幫模特兒化妝、整頭，相信Maggie呢一面，唔係咁多人有見過。」
