內地近年生產成本有增無減,部分港商都心思思有回流返港嘅念頭,但基於土地同缺乏相關人才等問題,因而打消呢個念頭。相反日本人就認真坐言起行,中華總商會青委副主席林智彬透露,同樣喺內地設廠嘅日本人,唔少都搬返日本製造玩具喎。

徐珊雯(左)同黃雅芝(右)均指本港需要培訓鐘錶業人才。

林智彬(右)透露有內地設廠的日本人回流當地製造玩具,旁邊為霍英東集團副總裁霍啟文。

沈慧林(右)嘅鐘錶品牌研發室開張,鐘錶界老行尊孫秉樞都有到場支持。

家族經營玩具生意嘅林智彬解釋,日本廠家回流日本設廠,底因係日本擁有足夠土地,就算要設置大型機器都冇問題,加上目前有唔少日本人喺內地廠房做嘢,叫佢哋返自己國家應該好過留喺外地,所以唔少收藏級玩具,均搬返日本製造。

內地人工高 法規常改變

除咗玩具業,一批鐘錶業界都有喺內地設廠,好似本身係做鐘錶嘅鐘錶業總會副主席徐珊雯話,內地員工人工高、法規又時有改變,因此想將廠房搬返香港,但佢哋嘅錶屬於勞工密集式生產,而香港做錶嘅人太少,所以再三考慮後都係搬唔到返嚟。此外,為咗開拓時鐘市場,佢哋已取得荷蘭博物館授權,將梵高名畫融入時鐘入面,仲特登搵英國相關專業人士將時鐘當藝術品做,希望可以走高檔路線。

身為鐘錶業總會副主席嘅九龍錶行第三代後人黃雅芝則透露,總會已經同職訓局合作搞實習計劃,希望可以有助改善業界缺乏人才嘅情況。同場仲有「港版陀飛輪」品牌萬希泉創辦人沈慧林,早前品牌嘅香港研發室已開張,佢透露已經將廠房由內地搬返港,但手錶要完全係「香港製造」有難度,因為廠房機器太大,喺香港搵唔到咁大嘅地方可以容納到,換句話說,講到最後又係土地問題嘞!

第一手消息請下載on.cc東網iPhone/iPad/Android/Windows Phone Apps