政壇：建仔橫額鬧笑話 劉江華樣貌打格
距離區議會換屆選舉只有三個月，大街小巷都掛滿區議員或社區幹事嘅宣傳橫額，而橫額一般用嚟做個人宣傳或介紹政績，部分都會夾雜同高官嘅合照，幫助政黨宣傳。有人發現建仔嘅社區幹事張子賢喺沙田大水坑選區嘅橫額，竟然將新任民政事務局局長劉江華嘅樣貌同姓名「打格仔」，唔通涉及不雅成分？
葛珮帆（左）一度同劉江華密斟，莫非係講緊橫額被「打格仔」一事？
橫額中劉江華的樣貌被「打格仔」，令人以為有人無面見人。
以「成功爭取」見稱嘅建仔不時都鬧出笑話，今次張子賢嘅橫額內容係二○一一年發起嘅簽名行動，成功爭取喺區內候車處加建座椅，橫額入面有兩個地方係印有劉江華嘅樣貌，但就畀人打咗格仔，令到人以為局長涉及不雅，甚至係無面見人。張子賢解釋，有關宣傳品係由其他同事負責，但劉江華依家已成為問責官員，認為不宜用喺政黨橫額上。
事有湊巧，劉江華尋日出席沙田區清潔衞生活動，現場所見，其徒弟、立法會議員EQ葛珮帆一度同劉江華「咬耳仔」，唔知EQ有冇趁機同師傅解釋吓，其樣貌被「打格仔」一事免得被誤會呢？
