政壇：搞搞政：擬空降海怡東 陳家洛被叫「過主」
公文袋副主席陳淑莊「復出」明年落戶立法會香港島選區，幾乎係政圈嘅公開秘密，現任立法會港島區議員陳家洛只可另謀出路，有人建議佢轉戰俗稱「超級區議會」嘅區議會第二界別議席，如意算盤係「空降」被視為中產選區嘅南區區議會海怡東，挑戰現任獨立建制派議員林啟暉，但原來未報名參選，已有「攔路虎」出招勸退陳家洛，講緊係舊年因應海怡西商場大業主，想變身特賣場成立嘅海怡關注組。
民調支持率包尾
消息指「地頭蟲」、海怡關注組主席區元發早前出招去信公文袋領導層，自爆今年初及七月曾委託獨立人士分別做民調，訪問約一千一百人，顯示喺海怡東多名疑似候選人嘅支持率，結果關注組代表支持率最高，其次係林啟暉，包尾嘅係公文袋代表陳家洛，因此得出結論係不論係單對單，以至係三人混戰，都以關注組勝算較高。
區元發於信中開宗明義話以往非當區居民參選，好似今屆公文袋郭榮鏗出戰海怡東都失敗而回，因此證明「空降」唔得。佢其後語帶相關指陳家洛身為立會議員，又係大學教授，好難分配時間做地區工作，令到人質疑佢係為超級區議會而來，明示暗示希望對方唔出選，反建議對方「過主」出選南區田灣選區，聲稱當區選民希望有人挑戰已連續兩屆自動當選，現任南區區議會副主席陳富明。
據了解，公文袋早前回信予區元發，婉拒區元發嘅「過主」建議，死撐陳家洛關注該區訴求，「最終仍是市民的選擇」。區元發尋日接受查詢時表明，即使陳家洛維持落戶海怡東決定，佢都會繼續積極考慮出選，一副同陳家洛惡鬥在所難免嘅模樣。
