政府近年先後三次向立法會提出成立創新及科技局,不過三次均因為激進泛民拉布觸礁而回,外界估計立法會十月復會後,政府將會第四度就成立創科局闖關,身兼創新及科技諮詢委員會成員嘅中文大學校長沈祖堯幫手出口術,表明支持成立創科局,但當問及點樣解決拉布時,佢就話自己唔識解決政治問題,唔知呢啲係咪叫講就天下無敵,做就有心無力呢?

沈祖堯尋日出席一個青少年科技創新比賽時話,年輕人喺創意、發明、研究方面都有相當好嘅成果,香港學生呢方面經常喺外國攞獎,不過就因為冇環境培養佢哋,佢哋因而未能夠將發明變成產品,甚至係對社會有用嘅嘢。

三次立會闖關觸礁

佢又話相比日本、韓國同新加坡,佢哋嘅科研已經走到好遠,強調香港唔係缺乏人才,又認為成立創科局有其用處,因為可以協調唔同部門、學界同工業界做好科研,希望大家可以互相合作,積極討論未來喺呢方面發展咁話。

不過,一句到尾,即使講到創科局有幾好都係冇用嘅,因為依家最大問題係過唔到立法會呢一關,而事實上,政府近年已經為成立創科局三次向立法會闖關,結果都係衰喺議員拉布上,相信十月復會政府再提成立創科局,都避唔過被拉布嘅命運。

當問到點解決立法會拉布,同埋有冇良方妙計解決呢個問題時,沈祖堯疑有心無力,只係話自己只係搞教育同科研,政治因素嘅嘢佢唔識點解決喎。

換言之,喺激進泛民拉布下,創科局唔知幾時先開到局,亦唔知被視為內定做創科局局長嘅行政會議成員兼特首創新及科技顧問嘅楊偉雄,幾時先可以坐正?

第一手消息請下載on.cc東網iPhone/iPad/Android/Windows Phone Apps