城中鏡：盛品儒傳家寶袖口鈕變婚戒
亞視前高層James盛品儒同Michelle蔡一鳳舊年註冊，將喺今年十月八日補擺喜酒，婚禮籌備得如火如荼，兩人最近為婚禮四處奔波，佢哋透露婚禮半年前已開始籌備，現已踏入尾聲，由訂造婚紗、首飾、擺酒，花費逾千萬元，當中嘅藍寶石婚戒更係盛家嘅家傳之寶。
盛品儒（右）與蔡一鳳為籌備婚禮四處奔波。
藍寶石婚戒嘅設計圖
蔡一鳳一日走幾場仲要試埋婚紗。
Michelle好開心咁話：「對戒指係盛家嘅無價寶，佢哋一代傳一代，係一對藍寶石，本來老爺用咗嚟做袖口鈕，依家傳畀James，佢自己重新設計，將佢轉咗做對戒指。」James接住話：「對藍寶石喺爺爺嗰代已經有，喺盛家已有一段時間，感覺好有靈性，會保佑我哋，所以我設計嘅款式，好似天使保護住咁樣，依家攞咗去訂造。」Michelle收盛家之寶，而佢回乜嘢禮？佢話：「我係福建人，如果依傳統福建人嫁女要畀好多嫁妝，而我呢代都無乜所謂，唔會跟足晒習俗，但媽咪話要做一隻五卡鑽戒畀女婿。」
最令佢哋頭痛嘅係酒席賓客嘅名單，由於兩家均是有頭有面，親朋好友眾多，男方唔少親友喺上海，而女方嘅就多數喺澳門，兩人為免親友專程飛嚟香港只為一餐喜酒，所以決定只擺三十圍。
