政壇：搞搞政：新界東票源銳減 范國威樁腳大亂
立法會議員向來好依靠區議員樁腳支持，但前白鴿黨嘅立會議員「橡筋褲」鄭家富早前明言有意喺明年立會選舉捲土重來，重奪新界東議席，佢要參選就要有地區樁腳支持，有傳新民主同盟沙田區議員丘文俊同容溟舟有意過檔幫佢助選。若果屬實，新同盟真係失去兩名區議員樁腳，意味新同盟嘅唯一立會議員范國威嘅票源必定銳減，選情真係危危乎。
丘文俊本身喺橡筋褲辦事處做咗四年職員，對於退黨助選，丘文俊指目前先着眼區議會選舉，「十一月之後，我仲做到樁腳先算啦」。佢認為要幫橡筋褲助選未必要退黨，只要配票得宜，橡筋褲同范國威有機會同時當選。橡筋褲前助理、新同盟大埔區議員任啟邦就講明，會先為新同盟參選人助選，認為橡筋褲都有足夠政治魅力，未必要樁腳幫助。
死撐有機兩人同當選
范國威今屆獲橡筋褲力撐都只係「掹車邊」當選，若橡筋褲出戰新界東必會分薄票源，仲要撬走新同盟區議員，范國威好大機會議席不保。范國威就話未聽過有黨員提出要幫橡筋褲助選，認為新同盟都算係新政黨，未經歷過以上情況，呢啲政治倫理問題要交由執委會開會決定，又認為喺比例代表制下，兩人未必會對立，泛民主派只要配票成功，有機會兩人同時當選。
正所謂「一山不能藏二虎」，早已有地區人士建議橡筋褲轉戰港島區，一來佢係南區區議會海怡半島出身，加上白鴿黨單仲偕或會棄選，橡筋褲與同區乳鴿比較，被看高一線。但橡筋褲似乎不為所動，相信冇人可以阻止呢場兄弟相爭嘅好戲上演，更甚係搞散新同盟。
