政壇：馬詩慧母子 攀石勁敏捷
名模Janet馬詩慧同囝囝Kadin王躍穎出席慈善活動，兩母子仲即場體驗室內攀石的樂趣，期間見兩人動作非常敏捷，喺短短數分鐘內就完成，Kadin仲不時攞起手機為Janet拍攝過程！Janet話係第一次玩，而Kadin就話：「玩過幾次！一定媽咪運動細胞強啲，咁佢遺傳落嚟畀我。媽咪爬時我都有望實佢，佢落嚟時都唔太識。」而Janet則笑言只係想快啲落地：「比我想像之中要出力多啲。每一下都要捉得好實，如果手鬆都唔可以繼續上到去。」
馬詩慧（右）同兒子王躍穎攀石大顯身手。
提到早前Janet出席公開活動，話唔希望Kadin擔任男Model，Kadin反問：「我媽咪幾時有講過？點解唔畀我做？自己都有興趣做Model，如果佢唔畀咪搵過第二份工作做，盡量尊重媽咪。」而Janet就話：「唔係唔畀。我都話男Model喺香港邊度搵到食，第二度都難，女仔都少咗好多嘢做。讀好書先，唔想畀佢有太多幻想。」
另外，Kadin透露依家身高已有六呎，問到目標係咪希望好似爸爸王敏德咁擁有「Man爆」形象，Kadin話：「當然想。」
