政壇：開心廚神賽 「宏」揚歡樂
呢排港股牛市曇花一現，話咁快就變成熊市，好多股民慘變「大閘蟹」，香港提升快樂指數基金主席Dennis吳宏斌亦都唔例外。佢話香港人快樂指數喺全球排名已經好低，最近喺全球宜居城市排名又再大跌十幾位，加上股市跌個不停，真係冇件開心事。所以基金發起首屆「開心廚神大賽」，希望大家講飲講食，人都開心啲。
吳宏斌希望搞開心廚神比賽令港人開心啲。
Dennis自稱識食唔識煮，但佢十幾歲出來打工時，曾負責紙盒廠大約十個、八個人嘅伙食，由採購到煮餸一手包辦，煮足四年。照咁講，佢嘅廚藝應該唔錯吖，佢就笑笑口話當時只係求其煮餐家常菜啫，正所謂「三餸一湯，白飯任裝」，談不上廚藝喎。
講番開心廚神大賽分為專業組同家庭組，參賽對象以取得「開心工作間」標誌嘅開心企業員工同管理層為主，亦歡迎員工家屬參與。九月將陸續進行初賽，決賽則於年底喺維園舉行嘅工展會期間舉行。
