政壇：鎅票賄選疑雲 觸發「傘兵」內訌
有「雨傘運動」之稱嘅佔領行動過後，出現唔少打算瞄準今年十一月區議會選舉同明年立法會選舉出戰嘅「傘兵」組織，威脅傳統泛民。近日多個「傘兵」組織就收到自稱Anthony Cheng嘅男子聯絡佢哋，開出條件話樂意資助傘兵參選區議會，但必須喺指定選區參選，部分仲係傳統泛民具優勢嘅選區。成件事唔止有賄選鎅票之嫌，仲觸發埋傘兵組織內訌，背後仲可能係傳統泛民同「傘兵」組織之間嘅角力。
與傳統泛民關係密
佔領運動後已退出新民主同盟嘅劉頴匡尋日喺社交網站透露，原本包括沙田社區網絡在內嘅多個收到Anthony Cheng聯絡嘅傘兵組織，經商討後決定同電視台記者「放蛇」，搵出Anthony Cheng幕後財團身份，有關行動正於安排階段。點知其中一個傘兵組織、由梁頌恒做召集人同發言人嘅「青年新政」，就喺社交網站上事先張揚消息，令調查疑似賄選事件曝光，而電視台亦被迫提早播出有關報道，搞到依家想起出財團身份都難。
劉頴匡就直斥青年新政「光環搶到是很威了，但計劃功敗垂成」，直言感到遺憾同失望。而青年新政就懶理劉頴匡批評，尋日仲去埋廉政公署備案，又呼籲其他團體都去。
至於事件中呢位Anthony Cheng，原來係網台主持人，中文名為鄭永建，同傳統泛民關係密切。佢尋日接受傳媒訪問時話只係想測試傘兵組織對收錢嘅反應喎。咩葫蘆賣咩藥真係佢先知，如果班傘兵組織真係肯收錢，咁網台下一步又點做呢？不過，雖然今次所謂嘅「測試」未成功，但已令傘兵團體互相指摘同爆發內訌，相信包括白鴿黨在內嘅傳統泛民一定會係最大得益者。
咁啱得咁蹺，白鴿黨尋日就有活動介紹佢哋嚟緊有意參選嘅新人，其中服務咗深水埗大南選區一段時間嘅馮文韜就話被青年新政攻擊，指控佢成日唔落區又唔做嘢。佢就反駁話自己成日落區，仲話白鴿黨做嘢唔係乜都擺上網喎。
