好嘅唔靈醜嘅靈。舊年佔領之亂搞到香港幾乎萬劫不復，加上接連出現嘅鳩嗚、驅蝗鬧劇，香港由好客之都變趕客之都。當時好多人預言，再咁落去旅遊零售業遲早玩完，呢嗱，果然不幸言中喇。

講多無謂，數字最實際。回歸十八年以來香港經濟淨係增長約百分之六十，而過去十年本港租金指數就暴升百分之二百五十，問你點頂！呢，好多傳統名店分店都因為捱唔住貴租而紛紛結業，早排大型直銷傢俬電器連鎖店結業，更加為零售業界敲響警鐘。以前經濟繁榮，遊客如鯽，就話旺區一舖難求，一個賣魚蛋小食嘅豆腐膶舖仔，租金都可以冠絕全球，可惜時移勢易，冇呢支歌仔唱好耐咯。就講尖沙咀栢麗購物大道吖，以往名店林立，生意好嗰陣時，幾貴租都有人做，今時今日有相連大舖業主「一分為二」招租，叫價比之前低兩成，一併租用平多啲都有商量，聽講同區好多類似吉舖，都咪話唔得人驚。

點解業主減租都制？冇計喇，形勢比人強，與其一直丟空養蚊，倒不如執得幾多得幾多實際啲，可想而知依家市道有幾差。好嘞，咁如果業主企硬又點呢？正如業界人士話齋，暑假原本係每年嘅零售旺季，但今年非常淡靜，部分商戶同業主正在商討租約事宜，如果業主拒絕因應現時情況減租，明年農曆新年後中小企將會掀起一股結業潮。

即係咁，百業蕭條，消費疲弱，除咗因為有人搞搞震趕客，內地雷厲風行反腐，豪客買少見少，加上港元隨美元轉強，旅客流失到歐美等地區，幾重夾擊之下，消費市場想唔衰都幾難。好似飲食業咁，以往每年一般錄得百分之七至八嘅增長，但今年估計只有百分之二至三；珠寶首飾、鐘錶等奢侈品銷情仲慘淡，銷售額比舊年跌超過一成。

當然喇，對一個正常嘅經濟體嚟講，消費零售唔掂，仲可以倚靠其他實業，影響始終有限，弊在香港經濟畸形，地產獨大，無險可守，地價、樓價、租金「三高」之下，有本土特色嘅小店幾乎摺清光，嗰陣時旅遊業興旺，活水源源不絕，都仲話有金行藥房等大型連鎖店撐住，家陣形勢逆轉，你話香港仲有咩出路吖。

講嚟講去，香港營商成本高企影響整體競爭力，根源在於地產霸權，呢個問題一日解決唔到，香港經濟始終走唔出困局，叮！