星級形象指導Tianyo馬天佑尋日出席新鴻基地產購物商場「YOHO MALL形點」發布會，擔任創意總監一職，為員工制服擔任設計工作。Tianyo透露近日同兩名朋友一齊經營甜品店，話：「因為我好鍾意食甜品，甜品店裝潢由我設計，試食咗起碼一千個蛋糕。」咁有冇特別主題？佢又話：「靚！一睇就知係馬天佑整，投資咗五位數字。」

馬天佑話甜品店嘅特色係要靚。

早前成為黎明旗下藝人，Tianyo話好感激對方：「我真係好鍾意同黎生合作，因佢真係好天馬行空，諗到乜就做！」聽得明佢啲金句？佢話：「我唔係好明，佢又唔係好明我講乜，兩個一齊唔明，但就會諗到新嘢，Chemistry就係咁出現。」