雖然好多家長都會安排子女參加暑期課外活動，但一般小朋友都怕熱、怕曬及怕辛苦，坊間部分社福機構就轉型搞皮革製作、咖啡店實習等「潮班」吸客。不過，經常搞青年活動嘅香港青年聯會秘書長Kenneth梁毓偉就話活動要辛苦，青年人先至會成長。而青聯常務副主席Johnny吳傑莊都話，過往唔少大學生參加佢哋嘅內地交流團時都嫌三嫌四，但佢堅持唔會遷就學生，覺得捱吓苦先會學識獨立。

吳傑莊（前排左四）話搞內地交流團，唔會遷就嫌三嫌四嘅同學。

梁毓偉話辛苦嘅活動先能夠令青年人成長。

范駿華（左）同盧金榮分別新上任青聯及菁英會主席，以後大把機會合作。

家長太過緊張

坊間好多僱主都話時下年輕人唔捱得，早前Johnny出席一個青年學生活動憶述，佢舊年搞嘅大學生內蒙古交流團時亦都有同感︰「大熱天時佢哋冇熱水沖涼又投訴、見到甴曱昆蟲又話驚，就連活動面試都要家長陪。」佢覺得依家啲家長太過緊張，年輕人又舒服慣，先至會乜都投訴一餐。雖然坊間有「潮班」遷就唔捱得嘅後生仔，吸引佢哋報名，但佢就話唔會遷就佢哋，否則唔會學到嘢喎。

過往亦搞過幾次中學生貴州義教活動嘅Kenneth亦都話一定要畀年輕人睇到啲「差嘅嘢」，佢哋先會學識感恩同知足，又話之前貴州義教活動，香港學生要送貴州山區小朋友返學，淨係去學校都要步行個半鐘，雖然辛苦，但見到學生返到香港脫胎換骨，覺得捱吓苦先會成長。

不過，青聯主席范駿華話有時搞戶外活動，真係大熱天時都避無可避，但佢就教路可以帶備一啲濕水變冷嘅運動毛巾，仲有近期好hit嘅風扇仔，咁就冇有怕啦！