往來長洲同香港仔之間嘅渡輪上周六「立秋」啟航，白鴿黨南區區議員羅健熙等多名乳鴿早幾日就印咗單張提醒市民渡輪班次，兼夾賣廣告硬銷該黨嘅爭取過程。班乳鴿本來一番好意，但就因為太唔小心甩轆累街坊搞錯船期，搞出個大頭佛。

有網友喺社交網站南區之友專頁投訴，話起初諗住跟白鴿黨個時間表，喺長洲坐五點五十分船返香港仔，點知原來時間表出錯，好在下一班船好快就到，該網友仲話現場所見，唔少人同樣中招添！

羅健熙喺市民留言一個小時之後，就急急喺社交網站向市民道歉，解釋話係因改版時錯用咗舊版嘅時間表，更加多次用到「萬分抱歉！」、「十分對不起！」同網友耍冧，希望得到網友原諒。

羅健熙回覆本報時，就話都無乜好解釋，因為做錯咗就係做錯咗，佢亦都唔會刪咗社交網站有關貼文。佢又話之後會派番張啱嘅單張去改正錯誤。