耀才證券「三巨頭」之一，即係市務總監「郭Sir」郭思治（圖）要靠iBond 5賺飯錢？真（o架）！但只係一餐咁多。尋日iBond 5首日掛牌，唔少散戶即沽貨，抽中兩手嘅郭Sir亦唔執輸，話耀才股東會後就去沽貨。

iBond 5尋日收報一百零五點五元，唔計手續費，每手賺五百五十元。兩手即是賺千零蚊，點使好？郭Sir話用嚟同老婆與囡囡食餐飯，推動吓經濟咁話。

佢又話有信心深港通今年第四季可以開通，仲覺得耀才啲內地客普遍對港股興趣多咗，尤其係啲香港大價股、國策股同AH差價股咁。咁睇，佢遲啲咪仲會再忙啲，真係要趁依家同老婆囡囡食多餐飯享受吓天倫之樂。

講開郭Sir位千金，唔覺唔覺原來今年都已經十九歲，依家讀緊大學金融系。想唔想囡囡第時入埋耀才？郭阿爸笑笑口話，會畀個女自己話事。嗱，郭千金，好多人聽到可以做證（o架）！