有香港男士早前以四十萬元向女朋友求婚，引起網上熱烈討論，相比之下，立法會勞工界前議員潘佩璆當年結婚就簡單得多，佢憶述當年結婚時經濟條件相當差，擺完結婚酒宴只剩番約四百元，連度蜜月嘅錢都冇，翌日吃完早餐後唯一節目係到超級市場「入貨」，幸好當年銀紙比依家襟用，因此四百元勉強可以捱到月底出糧。

潘佩璆同太太尋日度過三十五周年結婚紀念日。 （資料圖片）

潘醫生同太太尋日度過三十五周年結婚紀念日，佢喺社交網站話尋日早上仔同新抱就此傳來祝賀短訊，又想起當年生活點滴，指當年太太懷孕，剛好申請到醫務衞生署宿舍，太太仍願意同佢一齊搬家。

佢最後語帶感慨話過去三十五年往事如煙，當年嘅青澀稚嫩變成老成世故，而佢嘅仔轉眼間已為人丈夫、父親嘅角色，之不過唯一不變嘅係一路同行嘅太太喎。