話說路政署日前突然斬去半山般咸道四棵石牆樹，之後白鴿黨兩個中西區區議員許智峯同阿King鄭麗琼都去到般咸道掛晒汽球，做足大龍鳳話要哀悼石牆樹，又話不滿當局冇盡早通知。查實路政署喺事發當晚約七點半，已經電郵通知各區議員，但除咗當區議員陳捷貴同另一議員蕭嘉怡有喺斬樹前到場視察外，其他議員都冇盡力阻止斬樹。呢兩隻老嫩鴿事後嘅解釋，可以話係卸得就卸。

許智峯周五唔睇電郵

許智峯承認有收過電郵，但當晚冇睇到。佢話封電郵上周五晚傳過來，再細心勤力嘅同事，都冇可能睇到，唔可以話係議員疏忽，而係當局特登揀嗰個時間通知議員，係想避過爭議喎。原來作為咁關心居民嘅區議員，周五晚唔會睇電郵，唔知周五晚仲要收老闆電郵嘅打工仔會點諗呢？

佢又話成件事個責任係在於當晚喺現場嘅兩位區議會同事，即陳捷貴同蕭嘉怡，點解冇即場阻止斬樹。問佢如果喺現場會點做呀？佢話會阻止同表達呢件事未諮詢區議會，如果當局堅持要斬樹，就會報警喎。自己唔睇電郵就賴人，唔知份糧係咪要畀埋到場兩位議員呢？

阿King當晚睇到封電郵，但係入面提到「署方決定盡早移除四棵石牆樹」，佢話冇諗過即晚就斬樹，都有少少後悔冇問清楚民政事務專員。佢又話當晚十點幾鐘先收到街坊通知斬樹，即時將附近警署個電話號碼畀咗街坊，如果一早知道，就會叫齊記者到現場，阻止件事發生。講真嗰句，如果真係緊張啲樹，就唔係將警署電話號碼畀街坊，而係自己親身落去阻止啦！