相信大家仲記得喺政改方案表決當日,建制派喺投票一刻拉隊離場,結果發生世紀甩轆事件,事後外界普遍認為主張「等埋發叔」嘅經民聯副主席林健鋒,以及建制派「班長」兼建仔黨鞭葉國謙需要負上最大責任。曾經就事件含淚道歉嘅林健鋒,喺政改表決後首次接受傳媒訪問,佢話建制派之間嘅團結同互信好重要,要絕對相信組長指示喎。不過,富貴黨立法會議員田北俊曾經講過,唔認同建制派有黨鞭可以號召集體離場,咁林健鋒嘅諗法會唔會係一廂情願呢?

讚建仔共患難 冇互指摘

政改表決甩轆,唔單止凸顯咗建制派嘅內部矛盾,亦反映遇到突發事情時,冇一個夠分量嘅人有能力叫得郁所有人。先唔講全部有份投票嘅富貴黨,就連工聯會陳婉嫻、工業界林大輝同保險界陳健波都有留低投票。被視為建制派「壞孩子」嘅田北俊先喺社交網站上載一張豬仔相,疑似諷刺離場嘅三十三名建制派議員係豬;後來佢接受訪問時話,從冇投票選建制派黨鞭,又話如果建制派有人可以叫其他議員離場,不如合併做建制黨,即係暗示冇組長呢回事。

林健鋒尋日喺訪問節目中話,從事件中吸取到教訓,希望建制派未來可以加強互信。佢又話遇到突發事情時,建制派要絕對相信組長指示,否則好難講得上係團結喎。雖然團結固然係好事,但其他人唔合作就好難成事。佢又形容同建仔係患難見真情,喺甩轆一事上無互相指摘,唔知佢點睇其他互相卸責嘅黨派呢?至於其他人嘅批評同嘲諷,佢就話有則改之,無則加勉。

另外,政府早前表明政改後會集中精力處理民生同經濟事項,林健鋒認為特首梁振英好積極解決民生問題,尤其係住屋,奈何有人為反對而反對,阻礙政府施政。