一帶一路有前途 無奈香港嫌錢腥
有人話，得中國者得世界，真係一啲都冇講錯。好似由中國牽頭成立嘅亞投行咁吖，東西方國家爭相加入，就係最好證明嘞。無他嘅，中國強勢崛起，「一帶一路」戰略前途廣闊，商機無限，各國爭住分杯羹又有乜出奇喎。
所謂「一帶一路」，即係「絲綢之路經濟帶」及「二十一世紀海上絲綢之路」，利用中國嘅龐大投資及製造能力，帶動亞洲發展並與歐洲接軌，成立亞投行就係戰略一部分。唔係誇張，睇吓各國對亞投行嘅反應超乎預期，就知道國際對「一帶一路」高度重視喇。
正所謂，執輸行頭慘過敗家，香港又點可以例外吖。特首梁振英接受官媒訪問，話香港要抓住「一帶一路」嘅機遇，為國家扮演「超級聯繫人」嘅角色，港府正考慮成立專門機構推動喎。咁仲唔止，佢仲話面對新加坡及南韓等地嘅競爭，港府必須放棄過時嘅「積極不干預」思維，「適度有為」引導及配合企業，未來要集中精力搞好經濟及民生喎。
即係咁，特首呢番說話唔係無道理嘅，弊在冇乜新意啫。唔係賣花讚花香，本報一早強調香港佔盡近水樓台嘅優勢，只要能夠抓緊「一帶一路」機遇，搭上便車，香港可步上新台階，淨係太一叮都講到口水乾咯。可惜吖，忠言逆耳，近年香港好似撞邪咁，一味掛住內鬥內耗，邊有人關心一帶一路係乜東東吖，連特首自己都識講喇，過去兩年集中喺政改爭拗上，經濟及民生發展陷入停頓，家陣先話急起直追喎，遲唔遲啲吖。
遲到都係小事，至怕心有餘而力不足啫。大家有眼見，自從佔領之亂後，香港就未有一日平靜，部分人逢中必反，條件反射咁，已經到咗不可理喻嘅地步，莫講話配合國家發展經濟戰略吖，就算港府想發展新界東北增加土地供應咋，都被人扣上賣港帽子。加上反對派政客唯恐天下不亂，唔係拉布就係流會，港府想集中精力發展經濟、改善民生，簡直仲難過登天。
冇錯，香港喺金融、物流、貿易、專業服務等多方面底子雄厚，足以喺「一帶一路」擔當一席之位。問題係，如果香港自己唔爭氣，係都要自甘墮落，咁就神仙都難救嘞。一句講晒，弱勢政府百事哀，港府成日話要穩中求變、適度有為，未上台時係咁講，依家又係咁講，實情係亂中不變，適度無為就真，叮！
