即將六十五歲生日嘅新民黨主席葉劉淑儀，尋日喺社交網站發貼，形容自己係接近領取「兩蚊優惠」嘅長者，深感健康無價。佢又自爆已服用阿士匹靈近二十年，事關可以防癌喎。

葉劉自爆每晚都會食粒極低劑量阿士匹靈。
（資料圖片）

葉劉話一直注重運動同均衡飲食，更有一份自製高纖早餐餐單，包括將雜莓高纖麥片加入高鈣脫脂奶中，外加一個鮮橙，間中歎杯港式咖啡，可謂百吃不厭。

講講吓，佢自爆晚晚食一粒極低劑量嘅阿士匹靈，事關佢睇過相關醫學報告，若持續服用阿士匹靈十年以上，有四成機會預防直腸癌，而佢已維持此習慣近二十年。仲聲稱或者日子有功，最近佢嘅體檢結果好驚喜，連護士都讚佢「擁有運動員的脈搏」喎。

但有網友留言，擔心葉劉長期食阿士匹靈傷身體，建議試食中藥同玩健身。其實，本港醫學界多次提醒市民，不當服用阿士匹靈會引致腸胃不適甚至胃潰瘍等副作用，唔建議市民自行購買服用。