依家唔少人都鍾意上網訂購傢俬裝飾，但唔少政界人士仲選擇喺本港購買。香港傢俬裝飾廠商總會日前舉行六十周年晚宴，獲邀出席嘅商務及經濟發展局副局長Godfrey梁敬國一見到大會展覽嘅本地設計得獎傢俬作品，就即刻行埋去左睇右睇，仲忍唔住試坐添！同場嘅立法會紡織及製衣界立法會議員Felix鍾國斌就話買傢俬要喺香港買至放心，又話最鍾意梳化床，因為萬一畀太太趕出廳瞓都唔使咁辛苦喎。

鍾國斌好欣賞呢張特色座椅。

張雲正（右）升官後首次現身公開活動，以示支持嚴志明（左）。

梁敬國不停試坐唔同傢俬。

總會主席嚴志明見Godfrey對本地設計嘅傢俬咁有興致，就同佢介紹幾款多功能桌椅，雖然係展品，Godfrey都唔客氣試坐。見佢咁認真，問佢係咪好想買？點知佢就話冇錢喎！真係搞搞震，冇幫襯。

睇厭圖案可「換畫」

同場嘅Felix就話鍾意喺本地買傢俬，因為質素有保證，就算貴啲，但一用十幾年都抵番晒。好似佢屋企張大床就瞓咗二十年都好實淨。講開選購傢俬，佢最講究嘅係梳化，又話鍾意布梳化，一來可以洗，二來睇厭咗圖案就可以「換畫」。

新上任嘅公務員事務局局長Clement張雲正都有出席活動，事關佢同嚴志明係大學同學。Clement話佢哋十幾歲識到依家，所以一定要嚟支持。今次亦係Clement擔正局長後首個公開活動，真係畀足面老友喇！