上月般咸道有塌樹傷人意外,路政署日前突然斬去般咸道其餘四棵石牆樹。中西區區議員陳捷貴喺上周五斬樹當晚,喺社交網站貼咗緊急通告,話路政署發現石牆樹牆身出現新裂痕,加上天文台預料超級颱風蘇迪羅逼近本港,為免再塌樹,署方決定斬樹。但市民都知天文台話個風打唔到嚟。

陳捷貴

喺陳捷貴嘅「颱風斬樹論」曝光後,即時惹來網民不滿,仲波及同屬中西區區議員嘅蕭嘉怡,網民反問,點解唔先為樹木加固,又唔問樹木專家就斬樹,仲講到明「十一月區選見」,似暗示「樹債票償」。

陳捷貴解釋,自己喺社交網站只係引述路政署官員嘅講法,當日亦有於現場問及署方有冇其他做法避免斬樹,但署方話有即時危險堅持要斬樹,佢對此都冇辦法,反問「唔通攬住啲樹咩!」當日身在現場嘅蕭嘉怡亦話已第一時間批評同質疑官員即時移除樹木嘅理據,佢尋日促當局就事件提交報告予區議會。